“سازمان دموکراتیک یارسان بێڕێزی وە کاکەیەکان و موقەدەساتێان مەحکوم کەێ”

سازمان دموکراتیک یارسان بێڕێزی وە کاکەیەکان و موقەدەساتێان مەحکوم کەێ.

کاکەیەکان جور هەر پێکهاتەێک کە ساڵهاس لە مەناتق موختەڵف کوردستان عراق زنەی کەن، حەق دێرن جور هەر هاوڵاتیکتر بێ فەرق و جیاوازی و ڕەئاێەت هەق و حقوقەیل ئنسانی خوەێان جور باقی پێکهاتەگەلتر عراق ڕێز لەلێان بگیریەت.

دیارە چەن ڕوژ پێش گروێک لەچەکدارەێل حشد شعبی هەمڵە کەنە کەسێک کاکەیی و سەر و سێوڵێ تاشن، کە ئیە نەتەنیا بێڕێزیە وە بەشێک لە موقەدەسات کاکەیەکان بەڵکو کارێک بێ ئخڵاقانە و دویر لە ڕەوش ئنسانیە.

وە داخوە لە دویاێ هاتن گرو تروریستی داعش تا ئیسە دەێان کەس لە ژن و مناڵ و پیاگ لە کاکەیەکان لە شونگەل جیاواز لە عراق و کوردستان عراق کوشیانە و فرەجار مەجبور بویگنە مەناتق و میلکان ئەجدادی خوەێان وەخاتر پارێزان خوەێان وەجێ بیلن.

موتەئەسفانە کوشتن و بێڕێزی کردن وە کاکەیەکان لە تەرەف گروگەل جیاواز لە ناوچەگەل نیشتەجێ خوێانیچ وەپێان تا ئیسە ئدامە دێرێ. نە حکومەت عراق و نە حکومەت هەرێم کوردستان تەوەجە وە خواست و داخوازیکان کاکەیەکان ناکەن.

سازمان دموکراتیک یارسان هەر هەتک و بێڕێزیک وەهەر کەس و پێکهاتەێک مەحکوم کەێ و لە ئەین هاڵ لە حکومەت عراق و حکومەت هەرێم کوردستان داواکارە کەسانێک ئەو کارە ئەنجام دانە لە تەریق قانون مەحکوم بکەێ.

دیارە تەنیا داواکاری کاکەییەکان ئیەسە کە دویرخستنەوەێ گشت هێزگەل حکومی و حزبی و میلیشیایی لەو ناوچەگەلە کە کاکەیکان لەتێ زنەیی کەن.

سازمان دموکراتیک یارسان ئی کردەوەێ ناشایست و دویر لە ئخڵاقە مەحکوم کەێ و داوا کەێ ئەنجام دەرەێل ئی کردەوە وە سزاێ قانونی خوەێان بڕەسن.

شەوراێ مەرکەزی

سازمان دمکراتیک یارسان

۲۴.۷.۲۰۲۲