لە یەکیەتی زەوی‌لەرزەکەی کرماشان تا یەکیەتی شۆڕش ژن، ژیان، ئازادی

یارسان مدیا
‏2022‏.11‏.11

ن: دڵشاد قوبادی

ئیمڕۆژ 12 نوامبر، 5 ساڵ وە سەر کارەسات زەوی‌لەرزە 7/3 ریشتریەکەی ڕۆژ 12 نوامبر ساڵ 2017 وەرانوەر وە 21 خەزەڵوەر ساڵ 1396 خورشیدی لە ئوستان کرماشان گوزەریەت. کارەساتێک کە خەسارەیل گیانی و مادیێ ئەڕا مەردم کرماشان وەتایوەت مەردم یارسان ئی ئوستانە لە خەسارەیل شەڕ هەشت ساڵەی ئێران و عەراق و لەتمەیل لافاوەکان، شیمیاواران و کوشت کوشتارەیل 43 ساڵ دەسڵاتداری سیەی جمهوری ئسلامی ئێران کەمتر نەوی.

زەوی‌لەرزەکەی کرماشان کە گیان زیاتر لە هەزار کەس گرد و زیاتر لە دە هەزار کەس زامار و کەم ئەندام و ژمار بێ هەساوێک لە خەڵک ئوستان کرماشان بێ ماڵ و میلکان کرد. کارەساتێک کە ئێسەیشە لە شوون 5 ساڵ هەمرای جمهوری ئسلامی ئێران ئامارێک دەقیق لە قوروانیەکانێ بڵاو نەکردێەسەو و ڕاسیەکان سانسور کردێە.

لە حاڵێکا مەردم ماڵوێران و داغدار کرماشان وە بویچکتەرین هاوکاری هەوەجە داشتن، ڕژیم بیە سەروار خەم و موشکڵەکان مەردم و نە ئەوەیکە وە هاناێ مەردم لێ‌قومیاگ کرماشان نەچی، بەڵکو نواگیری لە رەسین هەرجوورە هاورکاری مەردمی لە چواربەش کوردستان و ئێران و تەنانەت وڵاتەیل ڕۆژئاوایی کرد. چەتەیل جمهوری ئسلامی وە بەستن ڕێیەیل هاوکاری، تەنانەت فرە لە هاوکارییەیل مەردمیێک کە ئەڕا کرماشان کل کریاوی، دزین و تاڵان کردن.

توانم لەیرە وە جورئەت بویشم گەل کورد لە چواربەش کوردستان هاوشان وەگەرد گەلان ئێران لە وەخت زەوی‌لەرزەکەی کرماشان خوەش‌بەختانە سیاسەت و فشارەیل تەبئیز و جیاوازەیەکان جمهوری ئسلامی خونسا کردن. خەڵک ئەبوبەکر مەعروفی ئاسا وە فدا کردن گیان خوەیان ڕێیەیل ڕەسانن هاوکاری وە مەردم لێ قومیاێ کرماشان واز کردن و گشت ئتیاجەیل ڕۆژانەی مەردمی ڕەسیە دەس مەردم کرماشان.

ڕاسیێک حاشا هەڵ نەگر کە لازمە ئشارە وەپێ بکەم یەکیەتیێکە کە لە بەین گەلان ئێران لە وەخت زەوی لەرزەکەێ کرماشان دروس بی. یەکیەتیێک کە لە ئیلام تا ئرومیە و لە زاهدان و سیستان و بەلوچستان تا تەیران و ئسفەهان هاوکاری ئەڕا مەردم زەوی لەرزە لێ دریاگ کرماشان کل کردن. جیا لەوانە لە بەشەیل ترەک کوردستان جوور ڕۆژئاوا، باکوور و باشوور کوردستان، هاوکاری ئەڕا مەردم لێ‌قومیاگ کرماشان کل کریا.

یەکیەتیێک کە ٥ ساڵ پێش لە کرماشان وە دی هات، ئیمڕۆژە لە شۆڕش ژن، ژیان، ئازادی وەهازتر بیە و گەلان ئێران و ڕۆژهەڵات کوردستان هاودەنگ و هاوشان یەکتر شوعار مردن ئەڕا خامنەیی و مردن ئەڕا دیکتاتور ویشنەو و گشت نزام دیکتاتوری رژیم ئێران گردنەسە نیشان. یەکیەتی و ئرادەی گەلان لە خیاوانەکان تا لە ناو بریان نزام جمهوری ئسلامی ئێران وچان ناگرێ و پاوەگەزدان و شۆڕش ئی 58 ڕۆژە ئەو ڕاسیە سابت کردێە.

جمهوری ئسلامی ئێران لە ساڵ 1979 وە ئێلام فتوای جەهاد زد وە گەل کورد لە رۆژهەڵات کوردستان زوڵم و دەسڵاتداری خوەی داسپانە سەر گەل لەو بەشەی کوردستانە. تاریخ شایەتە کە جمهوری ئسلامی ئێران لە 43 ساڵ دەسڵاتداری خوەی هیچ ڕێ و سیاسەتێک نەمایە کە لە سەرکوت و فەقیر هیشتن گەل کورد لە ڕۆژهەڵات تاقی نەکەیدەو. یەکی لە سڵاحەیل بێ دەنگێکە کە جمهوری ئسلامی وە درێژایی تاریخ لە ڕۆژهەڵات کوردستان وەتایوەت ئوستان کرماشان ئستفادە کردێە، سیاسەت تەبئیز و جیاوازی بییە.

بەڵام ئێسە گەلان جوقرافیای سیاسی ئێران فرە لە زوڵم و زورداریەکان هێزەیل سەرکۆتگەر رژیم ئێران وەهازتر و لە دەسڵاتدارەیل رژیم ئێران حالی‌تر و زاناترن. وەو خاترە دی رژیم ئێران نە وە زوڵم و سەرکوت، فەقیر هیشتن، کوشت و کوشتار و ئێدام ناتوانێ گەلان بێ‌دەنگ بکەی.

ئیمڕۆژ لە حاڵێکا ڕێز لە یاد و خاترەی گیانبەختکردێەیل زەوی‌لەرزەکەی ٥ ساڵ پێش ئوستان کرماشان گریم، گەلان ئێران لە گشت خیاوانەکان ئێران و ڕۆژهەڵات کوردستان بێ وچان زد وە نزام دیکتاتور ڕژیم ئێران شوعار دەن و ئەڕا وە دەس هاوردن زنەییک ئازاد و دموکراتیک دویر لە تەبئیز و جیاوازی داواێ لە ناوچیین نزام دیکتاتور ڕژیم ئێران کەن.

دڵشاد قوبادی