دانیشتن ڕاوێژی سازمان دمکراتیک یارسان لە شوپینگ، سوئد

یارسان میدیا
20.01.2018 شوپینگ سوئد

ڕوژ شەمە ١٩/١/٢٠١٩ وە بەشداری ئەندامان کومەێتە مەرکەزی، نەمایندەگان کومەێتە کشوریەکان و ڕاوێژکارەکان سازمان دمکراتیک یارسان لە شار شوپینگ سوئد وەڕێوەی چی.

ئی دانیشتنە لە ئاکام چەن دانیشتن وە و پێشنیار کومەێتە مەرکەزی، نەمایندەگان کومەێتە کشوریەکان و ڕاوێژکارەکان وە و مەنزور هەڵسەنگاندن ئال و گو ڕەکان ئیسەێ ئیران و شەرایەت ناو هێزەکان موخالف جمهوری ئسلامی و دەس نیشان کردن و تەشخیس کردن سیاسەت ڕابەری سدی لە بڕکە زەمانە لە وەرانوەر ئی ئاڵ و گوڕێەلە و فرە مەسەلەتر بەرپا کرێا.

لە سەرەتا، مەنسور جوانمیری جێگر قسەکەر سازمان دمکراتیک یارسان وە گەرد وە خەیر هاتن کردن بەشداران، دەستور کار جەلەسە ماڕفی کرد وە زمن تەئکید کردن لە سەر زەرورەت ئرتبات و ڕاوێژ وە گەرد کومەێتە مەرکەزی، لە مەورد مەسائل موهم و تەسمیمات کومەێتە مەرکەزی لە ئاڵ و گوڕە سیاسیە کان وە گەرد ئەندامان سازمان، بەشداران لە جەریان تەحولات ناو تەشکیلات سازمان و وەزئیەت سازمان قەرار دا.

لە شون قسەکان مەنسور جوانمیری، ئەمیر سەلیمی ئەندامان کومەێتە مەرکەزی و جێگر مەسئول کومیسیون ڕوابت خارجی سازمان وە تەور موفەسەڵ بەشداران لە ئاخریین ئاڵ و گوڕە سیاسیەکان ئیران، نزام سیاسی ئسلامی، هێزە موخاڵفەکان وە سیاسەت و ئستراتژی و ئەهدافێک کە کومەێتە مەرکەزی سدی با تەوجو وە خواز و ئنتزارات مەردوم یارسان لە وەرانوەر ئی شەرایەتە دێرنەێ ئاگادار کرد.

ئەو وە ژماردن خواز و حقوق وە دی نەهاتێ مەردوم یارسان و دوچوەکێک کە لە حەق ئی مەردومە کریەت وە ” نقشە راە سازمان دمکراتیک یارسان” کە وە تەسویب کومەێتە مەرکەزی ڕەسیە ئشارە کرد. ئەو وەت کە ئی نەخشە ڕێە مەوارد و مەفاد سیاسی و حقوقی فرە موهمێک هاناوێ کە لە سورەت وەدی هاتن و ئجرا کردنێ مەردوم یارسان توانن وە فرەێک لە حقوق ئنسانی و شاروەندی خوێان بڕەسن.

دانان و سوقمگیر بێین سیستمیک قەیر موتەمەرکوز لە جومڵە مەفادێکە لە نەخشە ڕی سازمان بی کە وە گەرد ئەندامان سدی تاوتوێ کریا. لە ئی نەخشە ڕێە، ڕێ حەڵ دانان سیستمیک سکولار قەیر موتەمەرکوز پێشنیار کرێاێە. ئەدەم تەمەرکوز وە ماناێ دابەش کردن ئختیارات لە بەین حکومەت مەرکەزی و حکومەتە مەحەلیە کانە. لە ئی جور نزام حکومەتیە تەسمیم گرتن ئمور مەحەلی لە هە مەنتەقە بایەد تا خوارتەرین واحد دابەشەکان وڵات تەوەست مەردوم ئەنجام بگریت.

لە ئی دانیشتنە وە زەرورەت ئستفادە کردن سازمان لە زوان کوردی ( گورانی، جنوبی، خواڕنگ) کە زوان داییکی مەردوم یارسانە تەئکید کریا، وە ئستفادە کردن لە زوان فارسی (زوان هاوبەش مەردوم ئیران) ئەڕا پێشبرد ئەهداف سازمان و خەوەر ڕەسانی لە ئاست جەمگای ئیران وە موهم زانریا.

لە ئی دانیشتنە لە سەر ئاڵا و سرود قسە و ڕاوێژ کریا. ئەندامان کومەێتە مەرکەزی سازمان هەڵوەژاردن یا موشەخەس کردن ئاڵاێ نەتەوی مەوزوییک پەێوەندیدار وە دەوارن دویای ڕەژیم وە و وجود هاتن شەرایەت دمکراتیک لە جەمگا زانستن کە فورسەت تەبلیق و ڕاوێژ کردن ئازاد لە سەر ئی مەسائڵە بوت. سازمان دمکراتیک یارسان فەقەت لە ئارم ڕەسمی سازمان ئستفادە کەیت، وە داوا کەیت کە تەشکیلات سازمان لە فەئالیتەکان خویان بەس لە ئارم سازمان ئستفادە بکەن. کومەێتە مەرکەزی ئئلام کرد کە سدی خاون سرود نییە.

.کومیسیون تەبلیقات و چاپە مەنی و کومیسیون ماڵی هەرکام وە نەوبەێ خویان گوزارشیک لە سەر شەرایەت کومسیونەکان وە بەشداران پێشکەش کردن. بەش ماڵی وەت کە تەنیا سەرچەوەێ ماڵی سدی حەق ئەندامایەتی، یارمەتی لایانگران و دوستداران سدیە. کومیسیون ماڵی داوا کرد کە تەشکیلات سدی لە وڵاتەکان بەرنامە ئەڕا جەم کردن یارمەتی بیشتر دابڕشنی.

کومیسیون تەبلیقات و چاپەمەنی باسێک لە مەورد سایت یارسانمدیا و یارسان فوێس پێشکەش کرد. بازێک لە ئەندامان گلەێ لە قەوانین سەختگیرانەی سایت لە مەورد ئنتشار مەتڵەوەکان خویان کردن وە داوا کردن کە کومیسیون تەبلیقات لە ئی مەوردە شیکردنەوە داشتوێت. کومیسیون تەبلیقات لە جواو وەت کە ئەوان ئنزبات و قەوانین تەسویب کرێاێ کومەێتە مەرکەزی لە مەورد سیات ڕئایەت و ئجرا کەن. کومیسیون تەبلیقات لە باسەکانێ ئشارە وە ئیە کرد کە ئەوان ئەڕا وە دوراە وە ڕی خستن یارسان فوێس دێرن کار کەن.

لە ئاخریین بەش دانیشتنەکە بەشداران وە گوفتە و پرسیارەکان خویان دانیشتنە کە دەوڵەمەن کرتن. بەشداران داوا کردن کە ایجور دانیشتنێەلێک تەشکیلاتی ئەڕا تاتوێ کردن ڕی و کار سیاسی سدی هەر چەن مانگ جاریک سازماندهی بێرێەیت.

لە بەشێکتر لە دانێشتنەکە ” تفاهم نامه پیشنهادی” کە لە تەرەف بەشێک لە موخالفین جمهوری ئسلامی ئامادە و مونتەشر کریاگە خریا وەر باس و قسە. کومەێتە مەرکەزی وەت کە ئی مەزوە وە گەرد نەمایندەگان کومەێتە کشوریەکان و ڕاوێژکارەکان تاوتوێ کریەت و تەشکیلات لە وردەکاریەکانێ ئاگادر کریەن.

کومەێتە مەرکەزی باوەڕ دیریت کە وە دەلایل تاریخی و فەرهەنگی موشکل سیاسی مەردوم یارسان وە گەرد باقی مەردوم ئیران وە یەک گری خواردێە، وە ئەمەلی بیین نەخشە ڕی سازمان خاستەرین ڕێ حەڵە ئەڕا دابین کردن حقوق مردوم یارسان.

ئەندامان کومەێتە مەرکەزی لە ئاخر دانێشتنەکە زمن قەدردانی کردن لە بەشداری چالاک و مەسئولانەێ بەشداران دوا لە تەشکیلات کرد کە ئەڕا پێشبرد سیاسەتەکان سازمان بێشتر کار و تەڵاش بکەن

سازمان دمکراتیک یارسان

کومەیتە مەرکەزی

شوپینگ 19.01.2019